Joh 9 | MCQ | STEP | Hu asima ro va'i kavume ea pina oahoni tei vaji rene nia supama roajaho kamana.

John 9

Jesura Nia Pa'ana Vejume Maranajina

1 Hu asima ro va'i kavume ea pina oahoni tei vaji rene nia supama roajaho kamana. 2 'Ejume Huni tisaiporuepo apoma ijá 'wava Najuhi'ine ea irahuni sisei rejume hu nia supavi'ina'e nahejare? 'Ú ea ikehunina ho emahwapunine? 'wavara. 3 'Ejume Jesu eha vene ijá 'iama Eakaho pane 'ee emahwaha 'u'o sisea pavejara kaivo Godira Huni haruriji ea kehuni vaji naja'irono avanana. 4 Nú Godia ka'ene ranamiume roujihuni kaukara iviamaa vea nituma namukeno vehuna. Ijihuni maijaho na'ia rouna'omo ea areri kaukaraa pavehuna. 5 'Enakaivo Na iki mwe'i hijujihuna'e Na mwe'a kehuni hanaji'ina 'iamana. 6 Hu ijí 'waravume paarejume Hu mwe'aki chera piso'ika'i tanihu va'ume saina kaji 'ene ea kajaho nia 'ahi 'onahana. 7 'E'ika'i ea kajaho ijá 'wama Va'e oni nia toa iha Sairoami soma 'wavume hu va'e

Noinsomarena nia marajume nirii'i kú'o 'unama roana. 8 'Ejumakame ea ka'ene huni rori hijajija marako'a hu nia supavu'e hine jariravi'i hiju'e kavura'omo ijá 'wava 'Ú eakaho jarisaravi'i hinujina raka? 'wavara. 9 'Ejume ea 'ahopo ijá 'wava Ijaho hurana 'iavara. 'Ejume vu ea 'ahopo ijá 'wava Hu pana kaivo areri hua'ina 'iavara. 'Enakaivo hu majama ijá 'iama Narana 'iamana. 10 'Ejume pu hu ijá 'wava A ichá vejume oni nia jaraane? 'wavara. 11 'Ejume hu eha vene ijá 'iama Ea ka'ene Jesuna 'wavujara saini 'ene nuni nia 'ahi 'oni'ika'i ijá 'wima Va'e toa iha Sairoami soma 'wivume na va'e ijí sovume maraniana 'iamana. 12 'Ejume pu ijá 'wava Hu ichihune? 'wavara. Hu ijá 'iama Na puruva reniu 'iamana.

Parasiapo Iraki Rejume Maranaji Savajina

13 'Ejume pu ea ka'ene marako nia supavi'ina kajaho apene Parasi puni roara. 14 Ijaho Sapati vei Jesura ea mwe'i vejume huni nia jaraana. 15 Ijí Parasi kajipo kú'o ea ka'ene marako nia supavi'ina kajaho apovara. Hu ichá'ina vejume huni nia maranaji apovara. 'Ejume hu ijá 'iama Hu saini 'ene nuni nia tanihiume na va'e toi somarejo nia niriuta 'iamana. 16 'Ejume ijihuna'e Parasi 'ahopo ijá 'wava Hu Sapati vea paakumu jihuna'e Godona parena roana 'wavara. 'Ejume vu ea 'ahopo ijá 'wava Ichá'ina ea sisea veji'ina aacha ija'ina venane? 'wamareja pu puruva rejumakame puni vaja kajino ahaavara. 17 'Ejume pu kú'o nia supavi'inijaho ijá 'wava Hu oni nia vejume maranaajaho a Hu irana ronane? 'wavume hu ijá 'iama Hu Poropetia rojuta 'iamana. 18 Jua ijí ea kaji nimarako nia supamana'e vejume maranajaho pu panimaa ronareja oahe'o omahe'o 'umenaara. 19 'Ejume pu ijí emahwaha aporama ijá 'iava 'Ú ike joni harihakaho nijaa nia supavi'ina nahejare? 'Enakaivo hu iviamaa ichá vene nia nirio? 'iavara. 20 'Ejume emahwapo eha vene ijá 'iava Nú heju hu nuni harihakaho nijaa nia supavi'ina nahejara. 21 'Enakaivo hu iviamaa ichá'ina vene nia niriajaho nú pakama pahejara. Ea irara vejume huni nia ka'ene maranajaho nú pakavara. Hu emakinakúne apove ori 'waramama 'iavara. 22 Ija'ina emahwapo 'warava jihuni maijaho pu Jua juhama avajara. Ijihuni maijaho Juapo ika 'iava jihuna'e ea irara Keriso rone 'wara'amajaho hu Sinakoku tanu'urahe pavu'e aruhuna 'iava jihuna'e avajara. 23 Ijihuni hahi emahwapo ijá 'iava Hu emakinakúne apoma heha 'iavara. 24 Ea ka'ene nia marako supavi'iniji pu kú'o ijá 'wava Iviamai Godi a venaume maranaa jihuna'e a Hu ta'aro'amana. Nú niheju ea kajaho sisea veji'inakúna 'wavara. 25 'Ejume hu eha vene pu ijá 'iama Hu sisea veji'ina ho pa'ajaho na pakama paheji'ina. 'Enakaivo na hena kavujaho na nii supamiana vo na niriu 'iamana. 26 'Ejume pu ijá 'wava Hu a iraka vetaane? Hu ichá'ina'e vejume oni nia jaraane? 'wavara. 27 Hu eha vene ijá 'iama Na ja ni'waravuta kaivo ja pahejara. Rakijihuna'e na kú'o 'wara'ejo? Ja Huni tisaiporua rehuna ura renau raka? 'iamana. 28 Pu hu ira sisea 'waramareja ijá 'wava A Huni tisaiporua kaivo nú Mosisi oni tisaiporu 'wavara. 29 Godira Mosisi 'waramajaho Nú niheju. Ijí ea kajaho Hu ichihi rena roajaho nú pahejura 'wavara. 30 Ea kajara eha vene ijá 'iama Ja ea kajaho ichí rene roana 'wivuji na hejujaho niho'o ani'ina'e reju'e heju. 'Enakaivo Hu nuni nia vejume jaraiana. 31 Nú niheju. Godi ea ka'ene sisea veji'inijipo 'waravujaho Hu pahenu kaivo ea ka'ene Godi juhavi'ina 'ee Hura ura renuja'ina'e vejujipo 'waravujaho Hu henu. 32 Nitama mwe'akara aneja renajine ei pini ike mwe'aki ea ka'ene nia supavi'ina nahenaji veje marahuna niho'o pa'amaa. 33 Ike eakaho Godoni parena ro'ipisa Hu unenu pina areri paveja'a 'iamana. 34 'Ejume pu eha vene ijá 'wava A niho'o sisea vaji nahenana kaivo a nú najuho? 'wa'ikaivo hu ranavume samai va'ana.

'Avena Huni 'Unamiji Pahena Pakavujina

35 Jesura henajaho pu ranavume hu samai va'ana'e henana'omo piunamarena ijá 'wama 'Ú a Emaa Puni Harihijaho nimaa rono? 'wamana. 36 'Ejume hu eha vene ijá 'wama Natohwe Hu ea irane? 'wariva henareje na Hu nimaa rojuma 'wamana. 37 'Ejume Jesu ijá 'wama A Ea kajaho nikamana'omo Hu iviamaa a hu'úmo 'wavi'i naminu 'wamana. 38 Natohwe na nimaa nimaa roju 'wa'i kaivo hu oja mahana. 39 Jesu ijá 'wama Na mwe'aki eha mi'i routa. Ijihuna'e ea nia supavi'ina nia nirihune 'ee nia nirii'ina veje nia supahuna 'wamana. 40 'Ejume Parasi 'aho'a ijí pu pu'úmo ahuma namijara'omo ijipo vu'a kaji henareja Hu ijá 'wava 'ú nú nia supavi'ina raka? 'wavara. 41 Jesu ijá 'iama Ja nia supavi'ina re'ipisa ja sisea pa'ana reja'a kaivo ja nia niri'ina 'wivujihuna'e joni sisea majaa navu 'iamana.